त्रिविको दीक्षान्त समारोह अब सातै प्रदेशमा, ९५ हजारभन्दा बढी विद्यार्थी दीक्षित हुँदै

३० असोज, काठमाडौं ।

त्रिभुवन विश्वविद्यालय (त्रिवि) ले विद्यार्थीको सहजताका लागि पहिलोपटक सातै प्रदेशमा दीक्षान्त समारोह आयोजना गर्ने भएको छ । यससँगै दीक्षान्त समारोहमा सहभागी हुन देशका विभिन्न जिल्लाबाट काठमाडौं आउनुपर्ने विद्यार्थीको बाध्यता हट्ने अपेक्षा गरिएको छ ।

त्रिविका उपकुलपति प्रा. डा. भोला थापाका अनुसार २०८३ साल पुसमा काठमाडौंमा मूल दीक्षान्त समारोह आयोजना हुनेछ । त्यसपछि सातै प्रदेशमा फरक–फरक समयमा दीक्षान्त समारोह सञ्चालन गरिनेछ । प्रदेशस्तरीय समारोहको मिति भने तय हुन बाँकी छ ।

‘प्रदेश–प्रदेशमा पुगेर छलफल गरिरहेका छौँ । हिजोमात्र सुदूरपश्चिमको धनगढीबाट फर्किएका छौँ,’ उपकुलपति थापाले भने ।

प्रदेशस्तरीय दीक्षान्त समारोहको तयारीका लागि त्रिविका क्षेत्रीय परीक्षा नियन्त्रण कार्यालयलाई प्रादेशिक संरचनामा रूपान्तरण गरिनेछ । सम्बन्धित प्रादेशिक कार्यालयका प्रमुखको संयोजकत्वमा आंगिक, सामुदायिक तथा सम्बन्धन प्राप्त निजी क्याम्पसका प्रमुख र कर्मचारी सम्मिलित समिति गठन गरिनेछ ।

उक्त समितिले दीक्षान्त समारोह आयोजना गर्ने उपयुक्त स्थान सिफारिस गर्नुका साथै आवश्यक तयारी गर्नेछ । समारोह सार्वजनिक स्थल वा क्याम्पसमा आयोजना गर्न सकिने उपकुलपति थापाले बताए ।

प्रदेशमा हुने समारोहमा काठमाडौंको मूल समारोहमा जस्तै सबै प्रक्रिया दोहोर्‍याउनुपर्ने छैन । त्रिविले यसपटक विद्यार्थीको सहभागिता कम भए पनि प्रदेशस्तरीय दीक्षान्त समारोह सुरु गर्ने तयारी गरेको छ । प्रदेशमा समारोह आयोजना गर्ने विषयमा सकारात्मक प्रतिक्रिया प्राप्त भएको थापाले बताए ।

यसअघि पनि त्रिविले प्रदेशस्तरमा दीक्षान्त समारोह आयोजना गर्ने तयारी गरेको थियो । तर सरकार परिवर्तनसँगै विश्वविद्यालयको नेतृत्व परिवर्तन भएपछि उक्त योजना अघि बढ्न सकेको थिएन । नयाँ पदाधिकारीले यस विषयमा छलफल अघि बढाउँदै विभिन्न प्रदेशमा पुगेर तयारी थालेका हुन् ।

देशका दुर्गम तथा टाढाका जिल्लाबाट काठमाडौं आउन विद्यार्थीले यातायात, आवास र अन्य खर्चमा ठूलो रकम खर्च गर्नुपर्ने अवस्था छ । परिवारका सदस्यसमेत सहभागी हुँदा खर्च र समय थप बढ्ने गरेको छ । प्रदेशमै दीक्षान्त समारोह आयोजना हुँदा विद्यार्थी, अभिभावक तथा कार्यरत कर्मचारीलाई समेत सहज हुने अपेक्षा गरिएको छ ।

९५ हजार ५४० विद्यार्थी दीक्षान्तका लागि योग्य

त्रिविका अनुसार यस वर्ष कुल ९५ हजार ५४० विद्यार्थी दीक्षान्त समारोहमा सहभागी हुन योग्य भएका छन् । त्रिविको ६७औँ वार्षिक दिवसको बैठकले विद्यार्थीको ग्रेसलिस्ट पारित गरेको हो ।

२०८२ साल असार १ देखि २०८३ साल असार मसान्तसम्म विभिन्न तह उत्तीर्ण गरेका विद्यार्थी दीक्षान्तका लागि योग्य भएका हुन् । कुल विद्यार्थीमध्ये प्राविधिकतर्फ १५.१० प्रतिशत र साधारणतर्फ ८४.९० प्रतिशत रहेका छन् ।

योग्य विद्यार्थीमध्ये एमफिलतर्फ २५३, स्नातकोत्तर डिप्लोमा (पीजीडी) तर्फ १८४ र विद्यावारिधि (पीएचडी) तर्फ १६६ जना रहेका छन् ।

संकाय तथा अध्ययन संस्थानअनुसार व्यवस्थापन संकायबाट सबैभन्दा धेरै ४३ हजार १४२ विद्यार्थी दीक्षान्तका लागि योग्य भएका छन् । त्यस्तै, शिक्षाशास्त्र संकायबाट १९ हजार ५३३, मानविकी तथा सामाजिकशास्त्र संकायबाट १५ हजार ४४१ र कानुन संकायबाट ३ हजार १ जना योग्य भएका छन् ।

विज्ञान तथा प्रविधि अध्ययन संस्थानबाट ६ हजार ६८८, इन्जिनियरिङ अध्ययन संस्थानबाट ५ हजार १६०, चिकित्साशास्त्र अध्ययन संस्थानबाट १ हजार ९२०, कृषि तथा पशु विज्ञान अध्ययन संस्थानबाट ४६३ र वन विज्ञान अध्ययन संस्थानबाट १९२ विद्यार्थी दीक्षान्तका लागि योग्य भएका छन् ।

सातै प्रदेशमा दीक्षान्त समारोह सञ्चालन गर्ने त्रिविको तयारी कार्यान्वयनमा आएमा विद्यार्थीले आफ्नै प्रदेशमा दीक्षित हुने अवसर पाउनेछन् । यसले दीक्षान्त समारोहमा सहभागिता सहज बनाउनुका साथै विद्यार्थी र परिवारको समय तथा खर्चसमेत घटाउने अपेक्षा गरिएको छ ।