ओमाननजिकै भारतीय झण्डावाहक जहाजमा आक्रमण, एक नाविकको मृत्यु

काठमाडौं।

ओमानको समुद्री क्षेत्रनजिकै भारतीय झण्डावाहक कार्गो जहाजमाथि भएको आक्रमणमा चालकदलका एक सदस्यको मृत्यु भएको छ। घटनामा अन्य १३ जनाको सकुशल उद्धार गरिएको छ।

भारत सरकारले सोमबार (नोभेम्बर २) जहाजमा अज्ञात हवाई वस्तु ठोक्किएको जनाएको छ। आक्रमणमा परेको ‘एमएसभी एल जुसुफी’ नामक जहाजमा १४ जना भारतीय चालकदलका सदस्य सवार थिए।

भारतका नौवहनमन्त्री सर्वानन्द सोनोवालले सामाजिक सञ्जालमार्फत घटनाबारे जानकारी दिँदै ओमानी तटरक्षक बलले १३ जनाको उद्धार गरेको र गुजरातका गान्धार नाहिम अजिजको मृत्यु भएको पुष्टि गरेका छन्।

भारतको नौवहन मन्त्रालयका अनुसार विश्वव्यापी व्यापारिक समुद्री यातायात क्षेत्रमा सबैभन्दा धेरै नाविक पठाउने देशमध्ये भारत एक हो। सन् २०२५ मा करिब तीन लाख २० हजार भारतीय नाविक समुद्री क्षेत्रमा सक्रिय थिए।

यसअघि फेब्रुअरी २८ मा इजरायल र अमेरिकाले इरानमाथि आक्रमण सुरु गरेपछि होर्मुज जलमार्ग आसपासको क्षेत्रमा भएका विभिन्न घटनामा भारतीय नाविकहरूको ज्यान गएको थियो।

अक्टोबर २८ मा भारतीय विदेश मन्त्रालयका प्रवक्ता रणधीर जैसवालले पश्चिम एसियामा जारी द्वन्द्वका क्रममा हालसम्म १४ चालकदलका सदस्यसहित २२ भारतीय नागरिकको मृत्यु भएको जानकारी दिएका थिए।

पश्चिम एसियामा बढ्दो सुरक्षा तनावका कारण समुद्री व्यापारिक मार्गमा जहाज तथा चालकदलको सुरक्षालाई लिएर चिन्ता बढ्दै गएको छ।